शब्दच जेव्हा रुसून बसले...

 

लेखणी अन वही घेऊन
मी एकांतात गेलो
कविता लिहावी म्हणून
चित्त लावून बसलो

काय लिहावं कसं लिहावं
विचारचक्र मग दौडू लागलं
जुळवणी शब्दांची करता - करता
मनही पार थकून गेलं

लेखणी जरी सरसावली
तरी शब्द काही सुचेना
आजच का असं घडतं ?
काहीच मला उमजेना

कविता लिहिण्यासाठी
यमक काही जुळेना
उमटलेल्या शब्दांचा
अर्थ काही कळेना

प्रथमच मी तेव्हा
स्वत:वरच रागावलो
हळूच कानात आवाज गुंजला
"आम्ही बाबा आज रुसून बसलो"

        ................ वैभव आलीम (१९/०१/११)