वृत्त - मृगाक्षी
(लगागागा लगागागा लगागा)
विसरणेही तुझ्या लक्षात नाही
तुला मी तेवढा अज्ञात नाही
सुरांना बनविले मी गीत माझे
कुणी ऐकायला रस्त्यात नाही
भुलावूनी मला वचनांमधे तू
अता जागा म्हणे हृदयात नाही
सखे मी चिंब झालो आसवांनी
मनातूनी कशी तू जात नाही?
छबी माझी स्वत: जाळीन मी ही
पुन्हा होणार कोणा ज्ञात नाही
कसा ठेवू भरोसा मी कुणावर?
अता सामर्थ्य हे शब्दात नाही
अता ना मोल अश्रुंचे तुझ्याही
जराही प्राण या देहात नाही
..... वैभव आलीम (२०/१०/११)
.JPG)
